語言偽術對於一段感情關係非常重要,最近男朋友一個神回應,就化解咗第三次世界大戰發生嘅危機。

事緣筆者最近睇完一本講斷捨離嘅書——《我決定簡約生活》後決定效法,攞哂自己大部分唔著嘅衫去回收。可惜堅持咗兩丶三個月後,終於忍唔住同男朋友講:「雖然我哋決定要斷捨離,但有時候都必須要買衫改變吓形象嘅。」

點知男朋友有樣學樣,佢話:「我都會繼續斷捨離,但係最近都想買返個高達砌吓,擺喺書枱。」

作為女人當然唔明白屋企放滿figure,剩係得個睇字有咩意思啦!我就話:「又話要斷捨離?不如你砌完啲高達再送俾人啦!」呢句「有口話人,冇口話自己」嘅說話,好可能已經得罪哂全世界嘅男人。

「吓?!」果然講起揼哂男人啲玩具,佢哋係會有少少激動。其實唔只少少,「Figure or me?」,佢哋心裡面會選擇前者,叫佢哋唔要啲玩具?佢哋會選擇唔要你。

咁結果男朋友點講?佢咪話:「砌完啲高達送俾人?心愛嘅嘢點可以送比人㗎?我砌完你,都唔會送俾人啦!」

我哋靜咗,然後爆笑咗起碼5分鐘。

講咁耐,想講嘅並唔係斷捨離,唔係女人嘅雙重標準,亦唔係男人應否儲玩具,而係喺呢場談判裡面,男朋友用語言偽術轉危為機,阻止咗一場世界大戰嘅發生。

做人有幽默感同轉數快真係好緊要,尤其是面對女友強詞奪理丶野蠻扭擰丶雙重標準嘅時候,鐘意佢但佢又咁野蠻,點算好?答案就係要比佢更野蠻。就好似筆者男朋友咁,識得用類比論證呢啲語言偽術,說服到(喺你面前先)轉數慢少少嘅女朋友之餘,又會讚你識得氹人開心。

但係千企唔好野蠻過頭,記得目的係氹掂對方,廣告都有話「贏咗場交輸咗個家,值得咩?」記得有個都市傳說就係最經典嘅例子,有對情侶喺小巴上面大聲開戰,男嘅頂唔順爆咗句:「臭x!」女嘅即刻轉數勁快鬧返佢:「臭你又x?」

完。

圖片來源:互聯網

Advertisements