studyroom people

又到DSE考試的季節,相信咁多位中六同學或者已經畢業的打工仔,都曾經去過自修室溫書,因為貪佢環境夠寧靜,但現實同理想總有差距,現實中的自修室並沒有想像中咁寧靜。人嚟,拖佢出去打!自修室令人討厭的10種人,總會做出非常滋擾別人的行為!

 

人嚟,拖佢出去打!自修室最令人討厭的10種人:

 

第1種人:情侶

自修室令人討厭的10種人,第1種人一定要數情侶!情侶的滋擾程度極高,佢哋除咗傾計、打情罵俏之外,仲不時有身體接觸,拖手仔、咀咀、捱膊頭、攬攬同摸摸都好閒,唔知大家仲見過啲乜嘢越軌行為呢?係啦,全世界都知你哋有男女朋友啦,我哋就毒銀1個啦!自修室係溫書的地方,唔係拍拖㗎!唔該你哋出返去先攬身攬勢啦~

studyroom1

 

 

第2種人:霸位

大家都知道霸枱係情有可原,都係想落去樓下快食個飯,然後上返自修室溫書,或者去咗廁所疴便便姐!但係有1種人係長期用書包霸住個位,攤開晒啲書,攞埋個筆袋出嚟扮曬嘢就走咗去,一走就走咗成半日,自修室關門先返嚟執嘢走,實在係太過分啦!究竟呢啲人知唔知我哋要mark實自修室開放時間,好早起身排隊,條隊長到出圖書館外面,但你哋竟然霸住個位,但唔係攞嚟溫書,簡直人神共憤!

studyroom2

 

 

第3種人:一大班Friend

有時自修室會被一大班人霸咗成行,佢哋全部都係同1間學校嘅Friend,唔講仲以為喺學校添啊!如果你試過都會知道,一大班Friend一齊溫書,只會有講有笑,點會溫到書先得㗎?你哋唔溫書唔緊要啊,唔好阻到我哋呢班真正想溫書嘅人,細聲講大聲笑真係好乞人憎!

studyroom4

 

 

第4種人:用耳機聽歌的人

好多人溫書的時候,都會聽歌。其實無錯,聽歌的確會令人精神爽利,溫書都溫得快啲,而且戴耳機同耳筒,都唔會滋擾到其他人。但係,你有冇諗過,即使你戴咗耳機或者耳筒,由於你較到個音量真係太大,加上節奏強勁嘅敲擊樂,所以坐喺你隔離位嘅人都會聽到㗎?!?!?!

studyroom3

 

 

第5種人:親子

去自修室的人有好多種,唔係剩係DSE的考生先有需要用到自修室,有時候都會見到唔少白領、阿叔阿伯,有時仲會見到一家大細添……咁就真係你唔好彩啦,你知啦小朋友係幾咁難教,同埋坐唔定,仲會大聲講嘢,激到啲阿媽發晒脾氣,完全聽到晒佢哋教功課嘅對話內容,真係1種折磨!

studyroom5

 

 

第6種人:散發香水/異味/食物味的人

喺自修室揀位其實同抽六合彩一樣,都係要講運氣,抽著個滋擾程度極高的鄰座,咁就成日都唔使集中溫書㗎啦!氣味都可以滋擾到人,唔知你試過,聞住隔離位人兄嘅體味、汗味同埋香水味嚟溫書未呢?仲慘就係掛住溫書未食飯,但就要聞住隔離飯香,真係好辛苦㗎,喊出嚟!

studyroom6

 

 

第7種人:病人

其實病人的滋擾程度都好高,尤其是當佢哋呻鼻涕、打乞痴、喪咳,但又唔戴口罩嘅時候,真係搞到人個心離一離啊!雖然人哋有病在身係好慘,唔應該責怪病人,但大家喺考試嘅緊要關頭,都係想靜靜地溫書,唔想被人傳染啫!所以大家有病就立即睇醫生,留喺屋企休息下啦!

studyroom7

 

 

第8種人:手機唔較靜音的人

其實大部分時間,自修室都係好寧靜,偶然唔好彩先會遇上滋擾程度高的人,但有1種人真係好討厭,就係手機唔較靜音的人,無論係鈴聲,定係What’s app、Messenger的訊息聲,全個自修室的人都聽到晒!最乞人憎嘅係,就算大家瞪到佢實一實,佢都面不改容,完全唔覺滋擾到其他人!

studyroom7

 

 

第9種人:係咁望人嘅人

通常自修室中間都會有1條大路,路的兩邊都係座位,小編將呢條路稱之為「Runway」,因為每當你行呢條路嘅時候,旁邊總有1種人,帶以色迷迷或者鄙視的眼光,打量你全身,令人極不好受和非常尷尬!

studyroom412

 

 

第10種人:傾電話的人

「Last but not least」,自修室入面神憎鬼厭的其中1種人,就係傾電話嘅人啦,圖書館、自修室一向都唔準人傾電話,但有啲人懶得行出去自修室傾電話咁麻煩,結果身邊嘅人耳仔受罪,唔該出返去先傾啦求吓你!

studyroom54

 

除咗以上10種人之外,仲有邊種自修室入面的人令你討厭呢?希望各位考DSE嘅Sizz讀者可以安安靜靜咁溫書啦!

有興趣可Like/Follow
Facebook Page: JJ Man
Instagram: jjman.c / cookingjj

Advertisements