數到最近城中熱話,當然係年尾年頭各台搞嘅頒獎典禮啦。除咗《新城勁爆頒獎禮》、《十大中文金曲頒獎音樂會》、《叱咤樂壇流行榜頒獎典禮》、《十大勁歌金曲頒獎典禮》之外,今年仲有毛記電視第一年搞嘅《分獎典禮》。無可否認,睇頒獎典禮都係其中一件樂事,睇吓今年有咩show睇,聽吓啲歌手嘅得獎感言,期待下一個獎係頒俾自己欣賞嘅歌手,跟住一齊唱嗰首難得自己都識唱嘅歌。但近年普遍香港人對於收睇頒獎典禮嘅興趣已經唔大,大家都覺得4個頒獎典禮嘅公信力欠奉。頒獎典禮結束嘅第二日,傳媒嘅焦點又落喺歌手啲緋聞炒作,而非音樂上面,頒獎典禮已經淪為大人之間關乎利益嘅一場遊戲。突然之間好掛住以前,每逢暑假最期待嘅《兒歌金曲頒獎典禮》,首首兒歌都識唱,望住啲卡通公仔喺度跳舞做Drama,但係連呢份簡單又純真嘅美好,由2009年開始,已經成為咗歷史嘅一部分,一齊回顧吓有邊幾首兒歌金曲係你認識嘅!

2bubsrd3o2zm

 

sddefault

hqdefault (5)

2s8fbwp

 

1998年:陳奕迅——超人的主題曲

呢首歌由小學唱到大學,連上到大學跳口水舞都仲唱緊,睇返記錄,《超人的主題曲》係1998年嘅得獎兒歌金曲,原來已經有接近20年歷史嘅兒歌。

 

 

1999年:陳浩民——寵物小精靈

寵物小精靈到依家都仲係風靡全球嘅大人同小朋友,連作為女仔嘅小編,以前都有1部遊戲機在手,又點會唔識唱呢首經典兒歌吖。

 

2000年:楊千樺——個個都有寶(Bom Bom彈珠人主題曲)

呢套卡通真係幾好睇,小編有追開,大家仲有冇印象?一套成功、多小朋友睇嘅卡通片,亦都係首兒歌出名嘅原因之一,即使首兒歌幾好聽,套卡通冇小朋友睇,又點會識唱呢?

 

2001年:陳慧琳——超級小黑咪

其實細心留意歌詞,呢首歌真係好鬼盞鬼,仲要係由當時天后級歌手陳慧琳唱出,可想而知以前啲兒歌係幾咁把炮。

 

2002年:郭富城——爆裂旋風(爆旋陀螺主題曲)

成個Mv都係睇住郭富城玩陀螺,以前即使女仔唔鍾意睇男仔卡通,都會睇吓啲兒歌Mv,討論吓啲男歌手靚唔靚仔,有舞王坐陣,冇可能未聽過。

 

2003年:梁詠琪——愛美麗天使

好少會有好似何韻詩把聲咁嘅歌手唱兒歌,可以去聽吓佢嗰首《小丸子的心事》,連佢本人都自嘲「一把老牛聲唱兒歌」,但係梁詠琪呢把甜美嘅聲音,就好適合唱兒歌啦。

 

2004年:Twins——齊來手牽手(哈姆太郎片尾曲)

講起哈姆太郎,除咗會記得「聽日一定會更開心嘅姐,係咪啊哈姆太郎?」之外,你仲記唔記得呢首歌?以前鍾意Twins嘅你,一定聽過啦。

 

2005年:容祖兒——明日恩典

天后級歌手容祖兒奪獎無數,都曾經攞過兒歌金曲獎㗎。

 

2006年:鄭嘉穎——Keroro軍曹

呢首歌出現咗兩把聲,其中一把聲係鄭嘉穎,另一把女仔聲都好好聽,但係有冇人知係邊個唱嘅呢?

 

2007年:佘詩曼——星星的加冕(《大長今》主題曲)

想當年韓劇《大長今》好鬼紅,出完真人劇集之後,乘勢出埋動畫,廣東話主題曲就係由佘詩曼唱㗎啦,有冇印象呢?

 

2008年:鍾嘉欣——彩虹國物語

呢套卡通未必有太多人睇過,但呢首歌真係好好聽,到依家都好有印象,因為好少兒歌係走中國風。

 

2009年:廖碧兒——夢(《多啦A夢》主題曲)

最後一屆《兒歌金曲頒獎典禮》係喺2009年,而當年嘅兒歌得獎金曲就係《多啦A夢》首最新主題曲啦,即使大人都會覺得好好聽!

 

以前每年暑期最期待收睇《兒歌金曲頒獎典禮》,呢個頒獎典禮絕對係大家嘅童年回憶,但都已經成為過去,總會替依家啲小朋友覺得可惜。

 

有興趣可Like/Follow
Facebook Page: JJ Man
Instagram: jjman.c / cookingjj

Advertisements