農曆新年仲有幾個禮拜就到,對於細路嚟講,終於得到暫時性嘅大解放,平時又要做功課,又要考試,又要考TSA,又要參加課外活動,仲要補習,終於等到有長假放、有利是逗、有新衫著、有好嘢食。對於已婚人士嚟講,真係相當頭痕,冇長假放,又要準備一舊錢去包利是、買賀年禮物、四圍去拜年。除此之外,仲有1班人都好頭痕,就係到咗所謂「適婚年齡」嘅朋友,特別係愛情長跑咗幾年,同埋過咗30歲仲係單身嘅朋友,又要坐定定等俾親戚盤問「儲到錢買樓未?」、「幾時結婚生仔?」等等嘅問題。

呢個世界好奇怪,由你一出世,個名唔係由自己話事,而係風水佬改嘅嗰剎那開始,好似已經有個人生指南guide住你。恭喜你,首先被賜予1個國家同城市嘅公民身份,要遵守當地定落嚟嘅法律,俾1班你唔鍾意嘅統治者管治。年少無知嘅你其實仲未知咁多住,剩係知道要讀好書,由幼稚園、小學、中學、大學一直讀上去,學啲咩唔到自己話事,總之就係要不停努力做功課同考試。10幾年順應住其他人對你嘅要求,好好醜醜終於畢到業,畢業之後就要搵到份好工。好工嘅定義係搵到銀,而唔係你鐘唔鍾意。而搵銀就係為咗供樓買樓,買到樓下1步就可以結婚生仔,組織家庭。之後繼續穩穩陣陣留喺1間公司,做個等退休或者等死嘅老屎忽。

講咗咁耐,其實都係講緊1樣嘢:公式化嘅人生。每逢農曆新年呢啲位,又見證住1班親戚有幾咁現實,每年都要提醒住你,要升職、儲錢、買樓、結婚、生仔。好啦,可能只係佢哋冇嘢講搵嘢嚟講。

每個人都有權利選擇佢條路要點行,唔應該聽其他人指指點點。畢業之後唔一定要做打工仔,唔一定要有層樓喺手,愛情長跑到最後唔一定要結婚,結咗婚都唔一定要生小朋友,人生唔一定剩係為咗搵錢。如果自己將來嘅人生一定要係買樓、結婚、生仔……咁循規蹈矩,冇癮又欠驚喜,依家死同老咗先死,其實係冇分別。

農曆新年仲有幾個禮拜先到,你仲有時間準備吓點樣面對呢個咁現實又殘酷嘅社會,同埋諗定點樣答「儲到錢買樓未?」、「幾時結婚生仔?」呢幾條難聽過粗口嘅問題。

 

你今日Like/Follow咗未?
Facebook Page: JJ Man
Instagram: jjman.c

Advertisements